༸སྐྱབས་རྗེ་འབོ་དཀར་མཆོག་སྤྲུལ་རིན་པོ་ཆེའི་མངའ་གསོལ་ཁྲི་འདོན་གྱི་མཛད་སྒོ།

ཟླ་བ་འདིའི་ཕྱི་ཚེས་༢༢ལྷ་བབས་དུས་ཆེན་དང་བསྟུན་ནས་རྒྱ་གར་བྱང་ཤར་རྡོ་རྗེ་གླིང་ཁྱབ་ཁོངས་མི་རིགས་ས་གནས་སུ་རྟེན་གཞི་གནང་པའི་འབོ་དཀར་ངེས་དོན་ཆོས་འཁོར་གླིང་དགོན་དུ་༧སྐྱབས་མགོན་རྒྱལ་བའི་རྒྱལ་ཚབ་དྲུང་གོ་ཤྲི་རིན་པོ་ཆེ་མཆོག་དབུ་བཞུགས་ཀྱི་ཐོག་༧སྐྱབས་རྗེ་འབོ་དཀར་རིན་པོ་ཆེ་མཆོག་གི་ཡང་སྲིད་མཆོག་སྤྲུལ་རིན་པོ་ཆེ་མཆོག་དང་འབོ་དཀར་དགོན་པའི་མཁན་རིན་པོ་ཆེ་མཆོག དེ་བཞིན་བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་རྒྱ་རི་སྒྲོལ་མ་ལགས་དང་འབྲས་ལྗོངས་མངའ་སྡེའི་ཆོས་དོན་བློན་ཆེན་བསོད་ནམས་བླ་མ་མཆོག་གི་དབུས་པའི་ཕྱི་ནང་དད་ལྡན་སེར་སྐྱ་མི་མང་སུམ་སྟོང་བརྒལ་བ་ཕེབས་ཞུགས་ཐོག འབོ་དཀར་རིན་པོ་ཆེའི་ཡང་སྲིད་སྐུ་ཕྲེང་གསུམ་པ་ཀརྨ་དཔལ་ལྡན་བློ་གྲོས་ཆོས་ཀྱི་རྒྱལ་མཚན་དཔལ་བཟང་པོ་མཆོག་གི་ཁྲི་འདོན་མངའ་གསོལ་མཛད་སྒོ་གནང་ཡོད་སྐོར། འབོ་དཀར་འོད་ཟེར་འཆི་མེད་དགའ་ཚལ་གླིང་བཤད་གྲྭའི་འཛིན་སྐྱོང་རྒྱུན་ལས་ཚོགས་མི་མཁན་རིན་པོ་ཆེ་ཆོས་གྲགས་རྒྱ་མཚོ་ལགས་ཀྱིས་འདི་ག་རླུང་འཕྲིན་ཁང་ལ་ངོ་སྤྲོད་གནང་བྱུང་། མཁན་རིན་པོ་ཆེ་ཆོས་གྲགས་རྒྱ་མཚོ་ལགས་ཀྱིས་ད་དུང་། དེ་རིང་ཕྱི་ཚེས་༢༣ ཉིན་ཡང་སྲིད་རིན་པོ་ཆེ་མཆོག་གི་ཁྲི་འདོན་མཛད་སྒོ་ཉིན་གཉིས་པའི་ཐོག རིན་པོ་ཆེ་མཆོག་ནས་སྤྱན་རས་གཟིགས་ཀྱི་བཀའ་དབང་བསྩལ་གནང་བ་དང་དེ་བཞིན་ཕྱི་དྲོ་ཚོགས་སྡེ་ཁག་ནས་རོལ་དབྱངས་ཀྱི་མཆོད་སྤྲིན་ཕུལ་གནང་གི་ཡོད་སྐོར་གསུང་གནང་བྱུང་།

གཞི་རྩའི་ཡང་སྲིད་རིན་པོ་ཆེ་མཆོག་གི་ཁྲི་འདོན་དང་འབྲེལ་བའི་ཉིན་གཉིས་པའི་ཆོས་འབྲེལ་སྐབས་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་ཕེབས་རྒྱུ་གནང་ཀྱང་ཛ་དྲག་གི་ལས་དོན་གྱི་རྐྱེན་པས་ཕེབས་ཐུབ་མེད་པ་རེད་འདུག འོན་ཀྱང་འབྲས་ལྗོངས་མངའ་སྡེའི་ཆོས་དོན་བློན་ཆེན་བསོད་ནམས་བླ་མ་ལགས་མཛད་སྒོའི་ཐོག་ལྷན་བཞུགས་དང་སྦྲགས་འདི་ག་རླུང་འཕྲིན་ཁང་ལ་ངོ་སྤྲོད་གནང་དོན་ལ། ༸སྐྱབས་རྗེ་འབོ་དཀར་རིན་པོ་ཆེ་མཆོག་གི་སྐུའི་ཡང་སྲིད་ཀྱི་ཁྲི་འདོན་མཛད་སྒོའི་ཐོག་ས་གནས་མི་རིགས་དང་རྡོ་རྗེ་གླིང་སིམ་ཀིམ། དེ་བཞིན་རྒྱ་གར་ཙམ་མ་ཡིན་འཛམ་གླིང་ཁྱོན་ཡོངས་ནས་སྐྱབས་རྗེ་འབོ་དཀར་རིན་པོ་ཆེ་མཆོག་གི་སློབ་མ་དད་ལྡན་པ་ལྷན་འཛོམས་ཀྱིས་སྐྱབས་རྗེ་རྒྱལ་ཚབ་རིན་པོ་མཆོག་གི་དབུ་བཞུགས་ཀྱི་རྟེན་འབྲེལ་མཛད་སྒོར་ངོ་བཅར་གནང་བ་ང་ཚོ་ཚང་མས་དགའ་དད་སྤྲོ་གསུམ་གྱི་གཟི་བརྗིད་དང་ལྡན་པ་ཞིག་ལ་ངོས་འཛིན་གྱིས་ཚང་མར་འཚམས་འདྲི་ཞུ་ཡི་ཡོད་ཅེས་གསུང་གནང་ཡོད།

སྒྲུབ་བརྒྱུད་ཀརྨ་ཀམ་ཚང་གི་རིང་ལུགས་འཛིན་པ་ཆོས་སྡེ་ཆེན་པོ་འབོ་དཀར་དགོན་གྱི་བླ་མ་འབོ་དཀར་རིན་པོ་ཆེ་སྐུ་ཕྲེང་གསུམ་པ་ཀརྨ་དཔལ་ལྡན་བློ་གྲོས་ཆོས་ཀྱི་རྒྱལ་མཚན་དཔལ་བཟང་པོ་མཆོག་ནི་ཕྱི་ལོ་༢༠༠༦ ལོར་སྦས་ཡུལ་འབྲས་མོ་ལྗོངས་ཀྱི་ཆར་དིང་ཆིམ་ཞེས་པའི་གྲོང་སྡེར་སྐུ་འཁྲུངས་ཤིང་། ཕྱི་ལོ་༢༠༡༤ ལོར་དཔལ་༸རྒྱལ་དབང་ཀརྨ་པ་མཆོག་གིས་ཡེ་ཤེས་དབྱིངས་དཔྱད་ཀྱི་བརྟག་ཡིག་དགོངས་དོན་གཞིར་བཟུང་ཕྱི་ལོ་༢༠༡༥ ལོར་ཁོང་ལ་སྐྱབས་རྗེ་འབོ་དཀར་རིན་པོ་ཆེ་མཆོག་གི་ཡང་སྲིད་འཁྲུལ་མེད་དུ་ངོས་འཛིན་མཛད་དེ་དབུ་སྐྲ་གཙུག་ཕུད་བཞེས་ཤིང་། མཚན་ཡང་ཀརྨ་དཔལ་ལྡན་བློ་གྲོས་ཆོས་ཀྱི་རྒྱལ་མཚན་དཔལ་བཟང་པོ་ཞེས་གསོལ་གནང་མཛད་ཅིང་རིག་བདག་ཡོངས་འཛིན་དགེ་བའི་བཤེས་གཉེན་སྐྱབས་རྗེ་མཁན་རིན་པོ་ཆེ་མཆོག་གི་དྲུང་ནས་ཡི་གེ་འབྲི་ཀློག་དང་སུམ་རྟགས་དག་གསུམ་གྱི་མཚོན་པའི་ཐུན་མོང་རིག་གནས་དང་ནང་དོན་རིག་པའི་གཞུང་ལུགས་ཁག་ལ་གསན་སྦྱོང་མཛད་ཞིང༧གོང་ས་༧སྐྱབས་མགོན་རྒྱལ་བའི་དབང་པོ་མཆོག་དང་དཔལ་༧རྒྱལ་དབང་ཀརྨ་པ་མཆོག་དང་༸བྱམས་མགོན་༸ཀྭན་ཏིང་ཏཱའི་སི་ཏུ་རིན་པོ་ཆེ་མཆོག་དང་སྐྱབས་རྗེ་རྒྱལ་ཚབ་རིན་པོ་ཆེ་མཆོག་དང་སྐྱབས་རྗེ་གྲུབ་དབང་སངས་རྒྱས་མཉན་པ་རིན་པོ་ཆེ་མཆོག་དང་སྐྱབས་རྗེ་མཁན་ཆེན་རིན་པོ་མཆོག་གི་དབུས་པས་དགེ་བའི་བཤེས་གཉེན་བཅུ་ཕྲག་དུ་མའི་དྲུང་ནས་སྡེ་སྣོད་གསུམ་དང་རྒྱུད་སྡེ་བཞི་བཀའ་གཏེར་དག་སྣང་གི་ཆོས་སྐོར་དཔག་ཏུ་མེད་སྨིན་བྱེད་དབང་དང་གྲོལ་བྱེད་འཁྲིད་ལུང་མན་ངག་དང་བཅས་པར་བརྩོན་པ་ཆེ་སྐྱེས་ཀྱི་བུམ་པ་གང་བྱོའི་ཚུལ་དུ་གསན་སྦྱོང་གནང་བ་སོགས་ཀྱི་མཛད་པ་རྒྱ་ཆེ་བསྐྱངས་དང་སྐྱོང་བཞིན་ཡོད་ཅིང་། ད་ལྟའི་ཡང་སྲིད་རིན་པོ་ཆེ་མཆོག་དགུང་ལོ་༡༨ ལ་ཕེབས་ཡོད་པ་རེད་འདུག།

གསར་འགོད་པ། པདྨ་དངོས་གྲུབ།

རྩོམ་སྒྲིག་པ། བསྟན་འཛིན་བདེ་སྐྱིད།

དྲྭ་ཐོག་སྤེལ་མཁན། པ་སངས་དོན་ལྡན།