དཔལ་འབྱོར་ཡར་ཐོན་ཅན་གྱི་རྒྱལ་ཁབ་ ༧ ཐུན་མོང་གིས་བོད་དང་ཤིན་ཅང་སོགས་ཀྱི་འགྲོ་བ་མིའི་ཐོབ་ཐང་གི་གནས་སྟངས་ཐད་སེམས་འཚབ་ཡོད་པ་ནན་བརྗོད་གནང་འདུག

ཡོ་རོབ་ཨི་ཊ་ལིར་ ༢༠༢༤ ཟླ་ ༡༡ ཚེས་ ༢༥ ནས་ ༢༦ བར་ཚོགས་པའི་དཔལ་འབྱོར་ཡར་ཐོན་ཅན་གྱི་རྒྱལ་ཁབ་ ༧ གྱི་ཕྱི་སྲིད་བློན་ཆེན་གྱི་ལྷན་ཚོགས་ནས་བོད་དང་ཤིན་ཅང་ཚུད་པའི་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་ཐད་ལ་མུ་མཐུད་སེམས་འཚབ་ཡོད་ཅེས་སྤྱི་བསྒྲགས་སྤེལ་བ་འདུག་པ་ལྟར། རྒྱལ་ཁབ་ ༧ གྱི་ཕྱི་སྲིད་བློན་ཆེན་ཐུན་མོང་ནས་སྤེལ་བའི་བསྒྲགས་གཏམ་དེའི་དོན་ཚན་ལྔ་པའི་ཆ་ཤས་གཅིག་བོད་ནང་གི་འགྲོ་བ་མིའི་ཐོབ་ཐང་དང་རྒྱ་ནག་གིས་སྤེལ་བཞིན་པའི་བྱ་སྤྱོད་ལ་བློ་འཚབ་ཆེན་པོ་ཡོད་པ་གསུངས་ཡོད་པ་ནི། སྟོབས་ཆེན་རྒྱལ་ཁབ་བདུན་གྱི་བློན་ཆེན་རྣམས་པས་བོད་ཀྱི་གནས་སྟངས་དེ་གནད་འགག་ཅིག་ཡིན་པར་ངོས་འཛིན་གནང་གི་ཡོད་པ་གསལ་པོ་ཤེས་རྟོགས་ཐུབ་པ་ཡིན་པས། བོད་མི་རྣམས་ནས་བོད་ཀྱི་གནས་སྟངས་དེ་རྒྱལ་སྤྱིའི་ཐོག་དྲིལ་བསྒྲགས་ཤུགས་ཆེ་བྱ་དགོས་གལ་ཆེ་བ་ཡིན་ཞེས། བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་། 

དྲྭ་ཐོག་རྩོམ་སྒྲིག་པ། བཀྲ་ཤིས་དབང་ཕྱུག

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།