༸གོང་ས་༸སྐྱབས་མགོན་ཆེན་པོ་མཆོག་གིས་ཀོ་རི་ཡའི་དད་ལྡན་པ་ཁག་ཅིག་ལ་མཇལ་ཁ་སྩལ་གནང་ཡོད་པ།

ཟླ་ ༡༡ ཚེས་ ༢༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ། དེ་སྔ་རྒྱ་གར་དུ་གནས་སྡོད་བོད་མི་རྣམས་དང་། བཞུགས་སྒར་གྱི་ལམ་ཟུར་དུ་ཚོང་ལས་བསྐྱོན་མཁན་བོད་མི་ ༢༠༠༠ ལྷག དེ་བཞིན་བོད་ཕྲུག་ཁྱིམ་སྡེ་བཅས་ལ་དཔལ་འབྱོར་མཐུན་རྐྱེན་བརྒྱུད་ཕྱག་རོགས་ལོ་མང་རིང་གནང་ཡོད་པའི་ལྷོ་ཀོ་རི་ཡའི་ (Yeosu) ནང་གི་ (SeokchungSa) དགོན་པའི་མཁན་པོ་ (Jinok Sunim) ལགས་ཀྱིས་སྣེ་ཁྲིད་པའི་ཀོ་རི་ཡའི་དད་ལྡན་པ་ཁྱོན་ ༣༠ ལ་མཇལ་ཁ་སྩལ་གནང་ཡོད་པ་དང་། འདི་ག་གསར་འགོད་པས་མཁན་པོ་ཇི་ནོག་ལགས་སུ་མཇལ་ཁ་གྲུབ་མཚམས་ཚོར་བ་ཇི་བྱུང་སྐོར་བཀའ་འདྲི་ཞུས་པར་ཁོང་གིས། ཀོ་རི་ཡའི་ནང་པ་མང་པོས་༸མགོན་པོ་མཆོག་གི་༸སྐུའི་འཕྲོད་བཞེས་དང་འབྲེལ་སེམས་འཁུར་ཆེན་པོ་གནང་གི་ཡོད་པས། དེ་རིང་དངོས་སུ་༸གོང་ས་མཆོག་མཇལ་སྐབས་ཞལ་མདངས་དང་སྐུའི་འཕྲོད་བཞེས་གང་ལེགས་ཡོད་པ་མཐོང་བ་ཙམ་གྱིས་སེམས་སྐྱིད་པོ་བྱུང་བ་མ་ཟད། ༸མགོན་པོ་མཆོག་གིས་དུས་རྟག་ཏུ་བོད་པའི་སྤྱི་ཚོགས་ཡར་རྒྱས་འགྲོ་རྒྱུའི་ཐུགས་རེ་གནང་གི་ཡོད་པ་བཞིན། ང་ཚོས་བོད་པའི་སློབ་གྲྭ་ཁག་དང་ཚོང་ལས་གཉེར་མཁན་ཁག་ཅིག་ལ་རོགས་རམ་བྱེད་བཞིན་པ་ནི་༧གོང་ས་མཆོག་གིས་ང་ཚོར་ནང་པའི་ཆོས་ཀྱི་སློབ་སྦྱོང་གནང་བ་དེ་དང་བསྡུར་ན་ཧ་ཅང་རིན་ཐང་ཆུང་ཆུང་རེད། ཅེས་འགྲེལ་བརྗོད་གནང་གི་འདུག

དེ་ཡང་ལྷོ་ཀོ་རི་ཡ་ནས་ཡིན་པའི་མཁན་པོ་ཇི་ནོག་ལགས་གཙོས་པའི་ལྷོ་ཀོ་རི་ཡའི་དད་ལྡན་པ་རྣམས་ནས་༸གོང་ས་མཆོག་གི་བཀའ་སློབ་ཀོ་རི་ཡའི་སྐད་ཡིག་ཐོག་བསྒྱུར་ཏེ་དཔར་སྐྲུན་གནང་བ་ཞིག་ཀྱང་༸གོང་ས་མཆོག་ལ་ཕུལ་འདུག་ཡོད་འདུག་ལ། ཀོ་རི་ཡའི་ཚོགས་པ་དེས་ཕྱག་རོགས་གནང་སའི་ལམ་ཁྲོམ་ཚོགས་པའི་ཚོགས་གཙོ་པདྨ་རིག་འཛིན་ལགས་ཀྱིས་གསུངས་ན། མཁན་པོ་ལགས་ཀྱིས་དུས་ཡུན་རིང་པོ་ནས་ང་ཚོར་དཔལ་འབྱོར་གྱི་མཐུན་རྐྱེན་ཞེ་དྲགས་སྦྱོར་གནང་གི་་ཡོད་པ་ནི། ང་ཚོར་ཤིན་ཏུ་བཀའ་དྲིན་ཆེན་པོ་ཡིན་པས་ད་ལན་ང་ཚོས་མཁན་པོ་འདིར་ཆེད་བཅར་དང་འབྲེལ་དཀའ་ངལ་ཏོག་ཙམ་ཡོད་པ་རྣམས་སྙན་གསང་ཞུས་ཡོད་སྐོར་འགྲེལ་བརྗོད་གནང་གི་འདུག

གཞན་ཡང་ཐེངས་འདིའི་མཇལ་བཅར་བའི་ཁྲོད་ཨ་རིའི་རྒྱལ་ས་ལྦ་ཤིང་ཊོན་ནས་ཡིན་པ་ (Khosen Samson) ལགས་ཀྱིས། ༸གོང་ས་མཆོག་ནི་འཛམ་གླིང་ནང་གི་ནང་པ་སངས་རྒྱས་པའི་བླ་ན་མེད་པའི་དབུ་ཁྲིད་ཅིག་ཡིན་ཞིང་། ༸མགོན་པོ་མཆོག་ནས་རྒྱལ་ཁབ་མང་པོའི་སྐད་ཡིག་བརྒྱུད་བྱམས་བརྩེའི་གོ་རྟོགས་སྤེལ་གནང་གི་ཡོད་པས། ཐེངས་འདིར་བྱང་ཆུབ་སེམས་དཔའ་ཞལ་བཞུགས་པ་ཞིག་དངོས་སུ་ཞལ་མཇལ་བྱུང་སོང་བས་བསྐལ་པ་བཟང་པོ་བྱུང་ཞིང་། ཁོང་ཚོའི་ཆོས་ཚོགས་ནས་ཀྱང་བོད་ཕྲུག་ཁ་ཤས་ཤིག་ལ་མཐོ་རིམ་སློབ་གྲྭར་འགྲིམས་ཆེད་དང་གྲྭ་བཙུན་ཉུང་ཤས་ཤིག་ལ་རོགས་རམ་གནང་གི་ཡོད་སྐོར་འགྲེལ་བརྗོད་གནང་གི་འདུག

རྩ་བའི་དེང་བཞུགས་སྒར་༸རྒྱལ་བའི་ཕོ་བྲང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས། བོད་རིགས་དང། མོན་པ། རྒྱ་རིགས་སོགས་འཛམ་གླིང་ས་ཕྱོགས་གང་ས་ནས་ཡིན་པའི་དད་ལྡན་མང་ཚོགས་ལ་གཟའ་འཁོར་གཅིག་ལས་ཉིན་གྲངས་གསུམ་རིང་མཇལ་ཁ་སྩལ་གནང་གི་ཡོད་པ་རེད།

གསར་འགོད་པ། བསྟན་འཛིན་ནོར་འཛོམས།

རྩོམ་སྒྲིག་པ། བདེ་སྐྱིད་ཀུན་སྒྲོལ།

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།