རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་མུ་མཐུད་དུ་རྡོག་རོལ་གཏོང་བཞིན་པ་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་ཐེར་འདོན་གནང་འདུག

རྒྱལ་སྤྱིའི་རང་དབང་ལྡན་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པ་(Human right watch)་ཡིས། རྒྱལ་སྤྱིའི་ཁྱོན་ཡོངས་ཀྱི་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ། སྤྱི་ལོ་༢༠༢༢ལོའི་སྙན་ཐོ་བཏོན་པའི་ནང་། རྒྱ་ནག་གཞུང་གིས་བོད་ཆོལ་གསུམ་གྱི་ས་གནས་གང་སར། འདས་ལོའི་ནང་མུ་མཐུད་དུ་ཆོས་དད་དང་སྨྲ་བརྗོད། འགྲོ་འདུག་དང་འདུ་འཛོམས་ཀྱི་རང་དབང་སོགས་ལ་དམ་དྲག་ཤུགས་ཆེར་བྱས་ཡོད་པ་མ་ཟད། གཞི་རིམ་སློབ་གྲྭ་ཁག་གི་ནང་བོད་ཡིག་རྩ་མེད་གཏོང་བཞིན་པ་དང་། ཁྲིམས་ལ་བཙན་གྱིས་བརྩི་བཀུར་བྱེད་དགོས་པའི་སློབ་གསོ་སྤེལ་བ་དང་མང་ཚོགས་ནང་སོ་མྱུལ་ཤུགས་ཆེ་བཏང་ནས་གནས་ཚུལ་མཁོ་སྤྲོད་པར་དངུལ་གྱི་བྱ་དགའ་སྤྲོད་པ། བོད་ཀྱི་ཆོས་དང་རིག་གཞུང་ལ་མཁས་པ་སྒོ་ཤེས་རབ་རྒྱ་མཚོ་དང་རོང་པོ་དགེ་འདུན་ལྷུན་འགྲུབ། ཐུབ་བསྟན་བློ་གྲོས་སོགས་འཛིན་བཟུང་བྱས་པ་མ་ཟད། ཚེ་དབང་ནོར་བུ་ལགས་ཀྱིས་རང་ལུས་མེར་བསྲེགས་བཏང་བ་སོགས་འཁོད་འདུག
དེ་འབྲེལ་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས། རྒྱ་ནག་གཞུང་གི་འགོ་ཁྲིད་ཚོས་ངེས་པར་བསམ་བློ་གཏོང་དགོས་པའི་གནས་སྟངས་ཆགས་ཡོད་པ་དང་། སྙན་ཐོའི་ནང་བོད་ནང་འགྲོ་བ་མིའི་ཐོབ་ཐང་དང་རང་དབང་མེད་པ་གསལ་བོ་འཁོད་ཡོད་པ་ལྟར། རྒྱ་ནག་གི་འགོ་ཁྲིད་ཚོས་བོད་ནང་བཟང་ཕྱོགས་ཀྱི་འགྱུར་བ་གཏོང་དགོས་པ་གསལ་སྟོན་གནང་གི་འདུག
འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་ཨེ་ཤེ་ཡའི་མངའ་ཁུལ་གྱི་འགན་འཛིན་(Elaine Pearson)་ལགས་ནས་ཀྱང་། སྤྱི་ཟླ་༡ཚེས་༡༢ཉིན་ཧིན་རྡུ་ནི་ཤེ་ཡ་རུ་གསར་འགོད་ལྷན་ཚོགས་སར། རྒྱ་ནག་གཞུང་གིས་ཤིན་ཅང་དུ་དྲག་གནོན་གྱི་དཔེ་ལེན་ས་ཕལ་ཆེ་བ་བོད་ནང་ཡིན་པ་དང་། འདས་ལོའི་ནང་རྒྱ་ནག་གཞུང་གིས་བོད་མིའི་ཐོག་དྲག་གནོན་ཤུགས་ཆེ་རུ་བཏང་བའི་ཁར། བཙན་དབང་ཐུབ་ཚོད་ཀྱི་གནས་ཚུལ་མང་པོའི་པར་དང་བརྙན་སོགས་མཐོང་རྒྱུ་མེད་པ་བཟོས་པར་བརྟེན། ཚེ་དབང་ནོར་བུ་ལགས་ནས་མི་ཚང་མའི་མཐོང་སར་རང་ལུས་མེར་བསྲེགས་བཏང་ཡོད་པ་དང་། བཙན་དབང་གིས་བོད་མིའི་ཁྲག་རིགས་རྒྱུད་རྫས་(DNA)་བསྡུ་རུབ་ཀྱི་སྲིད་ཇུས་ལག་ལེན་བསྟར་བཞིན་པ་དེ་ཤིན་ཅང་དུའང་ཡོང་གི་ཡོད་པས། བོད་ནང་བཟང་ཕྱོགས་ཀྱི་འགྱུར་བ་ཡོང་དགོས་ན། རྒྱལ་སྤྱིའི་སྲིད་གཞུང་མང་པོ་མཉམ་རུབ་ཀྱིས་རྒྱ་ནག་གཞུང་ལ་གདོང་ལེན་དང་གནོན་ཤུགས་སྤྲོད་དགོས་པ་ཨེ་ཤེ་ཡ་རང་དབང་རླུང་འཕྲིན་གྱི་བོད་སྐད་སྡེ་ཚན་ལ་འགྲེལ་བརྗོད་གནང་བྱུང་།
བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་པ་སངས་རྒྱས་སྐྱབས་ལགས་ནས་ཀྱང་། ད་ལོའི་སྙན་ཐོའི་ནང་བོད་ནང་སྐད་ཡིག་རྩ་མེད་བཟོ་བཞིན་པ་དང་མི་རིགས་རྒྱ་བསྒྱུར་གྱི་འཆར་གཞི་གཏིང་ཟབ་ཡོད་པ་འཁོད་ཡོད་པ་ནི། དམིགས་བསལ་ཛ་དྲག་གི་གནས་ཚུལ་ཡིན་པ་འགྲེལ་བརྗོད་གནང་བྱུང་།
རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་སྙན་ཐོ་དེ་ད་ལན་ཧིན་རྡུ་ནི་ཤེ་ཡ་རུ་བཏོན་ཏེ་ཡོངས་བསྒྲགས་གནང་ཡོད་པ་དང་། འགྲོ་བ་མིའི་ཐོབ་ཐང་ལྟ་ཞིབ་པ་ཚོགས་པ་འདིས་འཛམ་གླིང་ཡུལ་གྲུ་གང་སར་ལས་ཁུངས་བཙུགས་ཏེ་འགྲོ་བ་མིའི་ཐོབ་ཐང་ཐད་ལྟ་ཞིབ་རྒྱུན་མར་གནང་གི་ཡོད་པ་མ་ཟད། ཚོགས་པ་དེས་དངོས་ཤུགས་བརྒྱུད་གསུམ་ནས་སྲིད་གཞུང་སུ་གང་གི་རོགས་དངུལ་སོགས་ལེན་སྲོལ་མེད་པར་བརྟེན། རང་དབང་ལྡན་པ་དང་གཞུང་འབྲེལ་མིན་པ་སྟེ། གཞུང་བྱེ་བྲག་སུས་ཀྱང་ཆབ་སྲིད་ཀྱི་ཤུགས་རྐྱེན་མེད་པའི་འགྲོ་བ་མིའི་ཐོབ་ཐང་ཚོགས་སྡེ་ཞིག་ཆགས་ཡོད་པ་རེད།

གསར་འགོད་པ། བློ་བྷེ།
རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།