འགྲོ་བ་མིའི་ཐོབ་ཐང་ལྟ་རྟོགས་ཚོགས་པས་རྒྱ་ནག་གི་བྱ་སྤྱོད་ལ་སྐྱོན་བརྗོད་བྱས་འདུག

ཉེ་ཆར་ནག་ཆུའི་ཤག་རོང་པོ་དགོན་དགའ་ལྡན་དར་རྒྱས་གླིང་གི་མཆོག་སྤྲུལ་ཟླ་བ་རིན་པོ་ཆེ་ལྷ་ས་ནས་དགོངས་པ་རྫོགས་རྗེས། ཁོང་གི་སྐུ་གདུང་དགོན་པར་གདན་འདྲེན་ཞུ་རྒྱུར་རྒྱ་ནག་གཞུང་གིས་སྟངས་འཛིན་དང་། ཡུལ་མི་དད་ལྡན་པ་ཚོར་སྐུ་གདུང་ལ་མཇལ་མ་བཅུག་པ་སོགས་རྒྱ་ནག་གཞུང་གིས་དམ་དྲག་བྱས་ཡོད་པའི་བྱ་སྤྱོད་ནི། རྒྱ་ནག་གཞུང་ཕྱོགས་ནས་བོད་མིའི་ཆོས་དད་རང་དབང་ལ་སྒོ་གང་ས་ནས་སྟངས་འཛིན་ནན་མོ་བྱེད་བཞིན་པའི་མཚོན་རྟགས་ཤིག་ཡིན་པ། ཨ་རིའི་ནང་རྟེན་གཞི་བྱས་བའི་འགྲོ་བ་མིའི་ཐོབ་ཐང་ལྟ་རྟོག་ཚོགས་པས་ཕྱི་ཟླ་༤ཚེས་༦ཉིན་བཏོན་པའི་ཡོངས་ཁྱབ་བསྒྲགས་གཏམ་ནང་བཀོད་འདུག
མཆོག་སྤྲུལ་ཟླ་བ་རིན་པོ་ཆེ་འདི་ལོ་ཕྱི་ཟླ་༡ཚེས་༣༠ཉིན་ཁོང་གི་ལྷ་སའི་གཟིམས་ཤག་ཏུ་སྐུ་གཤེགས་ཤིང་། སྐབས་དེར་དགུང་གྲངས་༨༦ལ་ཕེབས་ཡོད་པ་རེད། ཁོང་གིས་རོང་པོ་ཆོས་རྗེ་སྐུ་ཕྲེང་བརྒྱད་པའི་ཡང་སྲིད་ངོས་འཛིན་ཞུ་ཕྱོགས་སྐོར་༧གོང་ས་སྐྱབས་མགོན་ཆེན་པོ་མཆོག་ལ་དགོངས་སྐོར་འབྲེལ་བ་ཞུས་པར་བསྙད་དེ་རྒྱ་ནག་གཞུང་གིས་ཁོང་ལ་ཕྱི་ལོ་༢༠༡༠ལོར་ལོ་ངོ་བདུན་གྱི་བཙོན་འཇུག་ཁྲིམས་ཐག་བཅད་ཡོད་པ་རེད།
ཨ་རིའི་ནང་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་རྒྱ་ནག་སྡེ་ཚན་གྱི་འགན་འཛིན་སོ་ཕི་རི་ཆརཌི་སན་ལགས་ཀྱིས་ཕྱི་ཟླ་༤ཚེས་༦ཉིན་སྤེལ་བའི་བསྒྲགས་གཏམ་དེའི་ནང་། སྐུའི་གདུང་མཆོད་དང་རོང་པོ་ཆོས་རྗེའི་ཡང་སྲིད་ཐད་ལ་རྒྱ་ནག་གཞུང་གིས་དམ་དྲག་དྭོགས་ཟོན་བྱས་པ་ནི། རྒྱ་ནག་གི་དཔོན་རིགས་ཚོས་བཙན་ཤེད་སྒོ་ནས་བོད་བརྒྱུད་ནང་བསྟན་གྱི་ཐོག་ལ་༧གོང་ས་༧ཏཱ་ལའི་བླ་མ་མཆོག་གི་ཤུགས་རྐྱེན་འགོག་ཐབས་དང་། རྒྱ་ནག་གཞུང་གིས་མཐའ་གཅིག་ཏུ་ཆོས་ལུགས་ཐོག་ལ་དབང་ཤུགས་འཛིན་པའི་བྱ་སྤྱོད་ཞིག་ཡིན་ལ། འདི་ནི་མུ་མཐུད་བོད་ཀྱི་གནའ་སྲོལ་རིག་གཞུང་ཐོག་དམ་དྲག་གིས། དེའི་རྗེས་འཇུག་པ་ཚོར་སྡུག་སྦྱོང་དང་དྲག་རྩུབ་བྱེད་བཞིན་པའི་མཚོན་རྟགས་གསལ་པོ་ཞིག་རེད་ཅེས་གསུངས་འདུག

གསར་འགོད་པ། སྐལ་ལྡན་བློ་གྲོས།
རྩོམ་སྒྲིག་པ། རིག་ལྡན་སྒྲོལ་མ།
དྲ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲ་ཐོག་སྤེལ་མཁན། ཀླུ་འབུམ།