རྒྱ་ནག་གཞུང་གིས་རྔ་བ་ཀིརྟི་དགོན་པ་ནས་གཞུང་གཉེར་སློབ་གྲྭར་བཅུག་པའི་སློབ་ཕྲུག་ཚོ་ཕྱིར་འགྲོ་སྐྱོད་མི་ཆོག་པ་སོགས་བཙོན་པ་ལྟ་བུ་བྱས་ཏེ་སློབ་གྲྭའི་ནང་བཅུག་ཡོད་འདུག

འདི་ལོའི་ཟླ་ ༧ པ་ནས་བཟུང་རྒྱ་ནག་གཞུང་གིས་བོད་མདོ་སྨད་རྔ་བ་ཀིརྟི་དགོན་པའི་སློབ་གྲྭ་སྒོ་རྒྱག་དགོས་པའི་བཙན་བཀའ་དང་འབྲེལ། ཀིརྟི་དགོན་པའི་སློབ་གྲྭར་གྲྭ་ཆུང་སློབ་ཕྲུག་ ༡༣༠༠ ཙམ་ཡོད་པ་ལས། སློབ་ཕྲུག་གཅིག་སྟོང་ལྷག་བཙན་ཐབས་ཀྱིས་རྔ་བ་རྫོང་གི་གཏན་འཇགས་སློབ་གྲྭ་ཁག་ཏུ་བཅུག་ཡོད་པ་བཞིན། ད་ལྟའི་ཆར་སློབ་གྲྭའི་ནང་དུ་ཕ་མ་དང་ཐུག་འཕྲད་བྱེད་མི་བཅུག་པ་མ་ཟད། རྒྱ་ཡིག་རྐྱང་བས་སློབ་ཁྲིད་དང་སློབ་གྲྭའི་ཕྱི་རུ་འགྲོ་སྐྱོད་མི་ཆོག་པ་སོགས་བཙོན་ཁང་ལྟ་བུ་བྱས་ཏེ་བཙན་ཐབས་ཀྱིས་བཅུག་ཡོད་པ། སློབ་ཕྲུག་ལ་ལ་ཕྱིར་གསང་བྲོས་བྱས་ཡོད་པ་རིགས་ཉེས་ཅན་མི་སྣ་འཛིན་བཟུང་ལྟར་བྱེད་བཞིན་ཡོད་པ། བོད་ནང་གི་འབྲེལ་ཡོད་བོད་མི་གཉིས་ནས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་བྱུང་།

གོང་ཞུས་འབྲེལ་ཡོད་ཅིག་ནས་མུ་མཐུད་འགྲེལ་བརྗོད་གནང་དོན་ལ། སློབ་ཕྲུག་ཚོ་དགོན་པ་ནས་བཙན་ཁྲིད་བྱས་པ་ནས་བཟུང་ཕ་མ་དང་ཐུག་འཕྲད་བྱེད་མི་བཅུག་པ་མ་ཟད། སློབ་ཕྲུག་ཚོར་ན་ཚ་རིགས་བྱུང་བར་བདག་པོ་མི་རྒྱག་པ་དང་སློབ་གྲྭའི་ནང་ཟ་མ་སོགས་ག་རེ་སྤྲོད་བཞིན་ཡོད་གསལ་ཁ་མེད་པ་དང་། ཕ་མ་དང་ནང་མི་ནས་བུ་ཕྲུག་དང་ངེས་པར་ཐུག་འཕྲད་དགོས་པའི་ཡར་ཞུ་བྱས་ཚེ། གོང་རིམ་ལ་ཆོག་མཆན་ཞུ་དགོས་སྐོར་བརྗོད་ནས་ཁ་འདྲ་མིན་ལ་གཡར་བ་དང་། མཐའ་མ་དེར་ཕ་མ་བཙོན་འཇུག་བྱ་རྒྱུ་ཡིན་སྐོར་སོགས་ཀྱི་གནོན་ཤུགས་དང་འཇིགས་སྐུལ་བྱེད་བཞིན་ཡོད་སྐོར་འགྲེལ་བརྗོད་གནང་བྱུང་།

སྤྱིར་དེང་སྐབས་ཙམ་མ་ཡིན་པར་དེ་སྔ་དགོན་པའི་སློབ་ཕྲུག་རྣམས་གཞུང་སློབ་གྲྭར་བཅུག་སྐབས། ཕ་མ་དང་ནང་མི་ཚོར་བཙན་ཐབས་ཤུགས་ཆེར་བྱས་ཡོད་འདུག་ལ། འབྲེལ་ཡོད་གཞན་དེས་གྲྭ་ཆུང་ཚོ་གཞུང་གཉེར་སློབ་གྲྭར་བཅུག་སྐབས་ཡུལ་ཚོ་སོ་སོ་ནས་ས་གནས་སྲིད་གཞུང་གི་མི་སྣ་དངོས་སུ་ཁྱིམ་ཚང་རེ་རེ་བྱས་ཏེ། ནང་མིར་གནོན་ཤུགས་འདྲ་མིན་སྤྲད་ནས་བུ་ཕྲུག་དགོན་པར་བསྐྱལ་མི་ཆོག་ཚུལ་དང་། བུ་ཕྲུག་གཞུང་གཉེར་སློབ་གྲྭར་མི་སྐྱེལ་མཁན་ཕ་མ་ཚོར་གཞུང་གི་རོགས་སྐྱོར་བྱས་པའི་ཁང་པ་འཕྲོག་རྒྱུ་དང་། སྨན་བཅོས་རོགས་སྐྱོར་མི་སྤྲོད་རྒྱུ། ལོ་རྒན་པ་རྣམས་ལ་རོགས་སྐྱོར་རེ་ཡོད་པ་དེ་གཅད་རྒྱུ་སོགས་བརྗོད་ཡོད་པ་མ་ཟད། ས་གནས་སྲིད་གཞུང་གི་ལས་བྱེད་མི་སྣ་མཚན་མོར་གློ་བུར་ཡོང་སྟེ་བུ་ཕྲུག་བཙན་ཁྲིད་དང་། རྔ་བ་ཆོས་རྗེ་མའི་ནང་དུ་བོད་མི་རེ་ཟུང་བཙན་ཁྲིད་སོགས་ཀྱི་གནས་ཚུལ་བྱུང་ཡོད་སྐོར་འགྲེལ་བརྗོད་གནང་བྱུང་།

ཀིརྟི་དགོན་པའི་ནང་བསྟན་སྔོན་འགྲོའི་སློབ་གཉེར་ཁང་ལ་དགེ་རྒན་བརྒྱ་དང་བཅུ་ལྷག་དང་། སློབ་མ་གཅིག་སྟོང་སུམ་བརྒྱ་ཙམ་ཞིག་ཡོད་པ་ལས། དངོས་གཞིའི་འཛིན་གྲྭ་དགུ་དང་སྔོན་འགྲོའི་འཛིན་གྲྭ་གཉིས་བཅས་ཁྱོན་འཛིན་གྲྭ་བཅུ་གཅིག་ལ་དབྱེ་ཡོད་པ་ལས། སྔོན་འགྲོའི་འཛིན་གྲྭ་ནས་འཛིན་གྲྭ་བརྒྱད་པའི་བར་གྱི་སློབ་མ་ཡོངས་རྫོགས་རྒྱ་གཞུང་གི་བཅའ་སྡོད་སློབ་གྲྭར་བཅུག་ཡོད་འདུག་ལ། འཛིན་གྲྭ་དགུ་པའི་ནང་ཡོད་པ་མང་དག་ཅིག་ལོ་ན་ ༡༨ ཟིན་ཡོད་སྟབས། དམིགས་བསལ་བཙན་ཐབས་སོགས་བྱས་མི་འདུག་ན་ཡང་། དེང་སྐབས་ཉིན་ལྟར་དགོན་པའི་རྒྱ་ནག་གཞུང་འབྲེལ་ལས་བྱེད་ཚོས་ཚོགས་འདུ་འདྲ་མིན་ཚོགས་བཞིན་ཡོད་འདུག་ལ། དགོན་པའི་ནང་དུ་གྲྭ་བ་དགེ་རྒན་མ་ཡིན་པའི་མི་སྐྱ་དགེ་རྒན་དབྱིན་ཡིག་དང་གྲངས་རིགས་སོགས་སློབ་ཁྲིད་གནང་མཁན་ཚོ་ཡང་ཕྱིར་ཕུད་བཏང་ཡོད་འདུག

གསར་འགོད་པ། བདེ་སྐྱིད་ཀུན་སྒྲོལ།

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།