བཙན་བྱོལ་དུ་བོད་མིའི་སྒྲིག་འཛུགས་སྲ་བརྟན་ཐུབ་པ་ནི་༸གོང་ས་མཆོག་གི་ཐུགས་རྗེའི་བཀྲིན་ལ་བརྟེན་ནས་བྱུང་བ་ཞིག་ཡིན་སྐོར། སྲིད་སྐྱོང་མཆོག་གིས་མོན་གྷོ་གཞིས་ཆགས་སུ་གསུངས་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་ལགས་ནས་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་གཞིས་ཆགས་སུ་༸སྐྱབས་རྗེ་དགའ་ལྡན་རིན་པོ་ཆེ་མཆོག་གི་ཁྲི་འདོན་མཛད་སྒོར་ལྷན་བཞུགས་དང་སྦྲགས། མོན་གྷོ་གཞིས་ཆགས་སུ་འཚམས་གཟིགས་ཐེངས་གཉིས་པ་གནང་ཡོད་པ་བཞིན། འདི་ཚེས་ ༢༧ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་ལགས་ནས་མོན་གྷོ་སམ་བྷོ་ཌའི་གཏན་སློབ་ཀྱི་དགེ་ལས་སློབ་ཕྲུག་རྣམས་ལ་གསུང་བཤད་སྐབས།  བཙན་བྱོལ་དུ་སྐྱབས་བཅོལ་བ་གཞན་དང་མི་འདྲ་བར་མང་གཙོའི་ཆ་ལག་ཡོངས་སུ་ཚང་བའི་བོད་མིའི་སྒྲིག་འཛུགས་ཡོད་པ་དེ་ནི་གཙོ་བོ་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་བཀྲིན་ལ་བརྟེན་ནས་བྱུང་བ་ཞིག་ཡིན་ཞིང་། ལོ་རྗེས་མར་༧གོང་ས་སྐྱབས་མགོན་ཆེན་པོ་མཆོག་དགུང་ལོ་༩༠་ཕེབས་ཀྱི་ཡོད་པས། བོད་མིའི་སྒྲིག་འཛུགས་ནས་དེང་སྐབས་འཛམ་གླིང་ནང་འཁྲུག་རྩོད་དང་རྙོག་གླེང་ཆེ་བའི་དུས་སྐབས་དེར་༧གོང་ས་མཆོག་གི་དགོངས་བཞེས་ལག་བསྟར་ཐུབ་རྒྱུར་ལོ་འཁོར་མོ་གཅིག་གི་རིང་བྱམས་བརྩེའི་ལོ་ཞེས་སྲུང་བརྩི་ཞུ་རྒྱུ་གཏན་འབེབས་གནང་ཡོད་པ་བཞིན། སློབ་གྲྭ་ཁག་གི་ནང་དུ་འང་རྒྱུན་ལྡན་དང་རྒྱུན་ལྡན་མ་ཡིན་པའི་ལས་རིམ་ཁག་གི་ནང་༧གོང་ས་མཆོག་གི་གོ་སྟོན་དང་འབྲེལ་༸མགོན་པོ་གང་ཉིད་ཀྱི་བཀྲིན་རྗེས་དྲན་ལས་རིམ་གང་མང་སྤེལ་དགོས་པའི་ལམ་སྟོན་གནང་འདུག་ལ། མ་ཟད་ཁོང་གིས་མུ་མཐུད། དེང་སྐབས་བོད་མིའི་སྒྲིག་འཛུགས་ཀྱི་ནང་དེ་སྔ་ཐོག་མར་བོད་ནས་བྲོས་བྱོལ་དུ་ཕེབས་མཁན་གྱི་མི་རབས་རྣམས་རྫོགས་འགྲོ་ཡི་ཡོད་པས་རྒྱ་གར་ནང་སྐྱེས་འཚར་བྱུང་བའི་མི་རབས་གཞོན་པ་ཚོས། བོད་སྤྱི་པའི་རྩ་དོན་ཐོག་འགན་འཁུར་ཏེ་བོད་དོན་ཐོག་རྒྱུས་ལོན་ཤེས་རྟོགས་ཀྱིས། རྒྱལ་སྤྱིའི་སྤྱི་ཚོགས་ཁྲོད་བོད་དོན་དྲིལ་བསྒྲགས་ཐོག་རྒྱབ་སྐྱོར་འཚོལ་ཐབས་བྱ་དགོས་པའི་ལམ་སྟོན་གནང་ཡོད་པ་རེད་འདུག

དེ་ཡང་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་འདི་ཚེས་ ༢༥ ཉིན་གྱི་ཕྱི་དྲོར་མོན་གྷོ་འདོད་རྒུ་གླིང་དུ་ཕེབས་འབྱོར་བྱུང་ཞིང་། འདི་ཚེས་ ༢༦ ཉིན་༸སྐྱབས་རྗེ་དགའ་ལྡན་ཁྲི་རིན་པོ་མཆོག་གི་ཁྲི་འདོན་མཛད་སྒོར་བཅར་རྒྱུ་གཙོ་བོ་འགྱུར་པའི་ཉིན་དེ་ནས་བཟུང་མོན་གྷོ་འདོད་རྒུ་གླིང་དུ་རྟེན་གཞི་བྱས་པའི་དགོན་སྡེ་ཁག་ཏུ་གནས་གཟིགས་དང་། གཞི་གྲོང་ཁག་དང་སློབ་གྲྭ དེ་བཞིན་ཚོགས་སྡེ་སོགས་སུ་གཟིགས་སྐོར་གནང་ཡོད་ཅིང་། འདི་ཚེས་ ༢༧ ཉིན་སྲིད་སྐྱོང་མཆོག་ནས་དགའ་ལྡན་ཚོགས་ཆེན་དུ་གནས་གཟིགས་དང་མཁན་བླ་དགེ་འདུན་འདུས་མང་ལ་གསུང་བཤད་གནང་ཡོད་པ་རེད་ལ། འདི་ཚེས་ ༢༨ ཉིན་འབྲས་སྤུངས་བློ་གསལ་གླིང་གྲྭ་ཚང་དུ་༸སྐྱབས་རྗེ་དགའ་ལྡན་ཁྲི་པ་ ༡༠༥ རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་གི་ཁྲི་འདོན་མཛད་སྒོར་ལྷན་བཞུགས་གནང་ཡོད་པ་རེད།

གསར་འགོད་པ། པདྨ་དངོས་གྲུབ།

རྩོམ་སྒྲིག་པ། བདེ་སྐྱིད་ཀུན་སྒྲོལ།

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།