རྒྱལ་ཚོགས་ཀྱི་བསྐྱར་ཞིབ་ཚོགས་འདུའི་ཆེད་བོད་ནང་གི་གནས་སྟངས་སྐོར་གྱི་སྙན་ཐོ་བཏོན་འདུག

རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐད་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཚོགས་མི་རྒྱལ་ཁབ་ཚོས་ལོ་༤ནས་༥རེའི་མཚམས་སུ་ཡོངས་ཁྱབ་བསྐྱར་ཞིབ་གནང་བཞིན་པ་ལྟར། བསྐྱར་ཞིབ་ཐེངས་བཞི་པ་དེ་ཕྱི་ལོ་༢༠༢༤ལོའི་ཕྱི་ཟླ་དང་པོའི་ནང་གནང་རྒྱུར་སོང་། བསྐྱར་ཞིབ་མ་གནང་གོང་རྒྱལ་སྤྱིའི་བོད་དོན་ལས་འགུལ་ཁང་དང་། འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་རྒྱ་ནག་གཞུང་གིས་འཆར་གཞི་ལྡན་པའི་ཐོག་ནས་བོད་ནང་གི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་ཚབས་ཆེན་གཏོང་བཞིན་པའི་ཞིབ་གསལ་སྙན་ཐོ་ཞིག་བཏོན་འགོད་འབུལ་ཞུས་འདུག
ཨ་རིའི་རྒྱལ་ས་ཝ་ཤིན་ཀྲོན་དུ་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གི་འབྲེལ་མཐུད་འགན་འཛིན་(Franz Matzner)་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་ན། སྙན་ཐོ་དེ་བརྒྱུད་མ་འོངས་ནུས་པ་གང་འདྲ་ཐོན་མིན་ཞུ་རྒྱུ་ཁག་པོ་ཡིན་ཡང་། རྒྱལ་སྤྱིའི་སྤྱི་ཚོགས་ལ་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྡོག་རོལ་གང་འདྲ་གཏོང་གི་ཡོད་མེད་ར་སྤྲོད་ཡང་ཡང་བྱས་བ་ཡིན་ན། རིམ་པས་རྒྱལ་ཁབ་མང་པོས་དེའི་སྐོར་ཤེས་རྟོགས་ཐུབ་ནས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་འགན་འཁྲི་རྒྱ་ནག་ནས་འཁྱེར་དགོས་པ་དེ་ཤེས་ཀྱི་རེད། དེ་བས་མཉམ་འབྲེལ་རྒྱལ་ཚོགས་ནང་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ཞུ་གཏུག་དང་གླེང་སློང་མུ་མཐུད་དུ་བྱས་ནས་བོད་ཐེ་བའི་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་བསྐྱར་ཞིབ་གནང་མཁན་ཚང་མས་ཤེས་རྟོགས་ཐུབ་པ་བཟོ་རྒྱུ་དེ་ནི་ང་ཚོའི་དམིགས་ཡུལ་ཡིན་ཅེས་འགྲེལ་བརྗོད་གནང་བྱུང་།
ཁོང་ཚོའི་སྙན་ཐོ་དེའི་ནང་། ཕྱི་ལོ་༢༠༢༤ལོའི་ཕྱི་ཟླ་དང་པོར་རྒྱལ་སྤྱིའི་སྲིད་གཞུང་ཚོས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐད་བསྐྱར་ཞིབ་གནང་སྐབས། རྒྱ་ནག་གཞུང་ལ་འགྲོ་བ་མིའི་ཐོབ་ཐང་དང་འབྲེལ་བའི་གནད་དོན་འདྲི་བརྩད་ག་རེ་ཞུ་དགོས་མིན་གསལ་པོར་བཀོད་ཡོད་འདུག་ལ། རྒྱ་ནག་གཞུང་གིས་སྲིད་ཇུས་ལྡན་པའི་ཐོག་ནས་བོད་མིའི་ངོ་བོ་དང་རིག་གཞུང་བཅས་དང་འབྲེལ་བའི་ཐོབ་ཐང་རྣམས་རྩ་མེད་བཟོ་རྒྱུའི་ཉེན་ཁའི་སྒང་སླེབས་ཡོད་པ་གསལ་སྟོན་གནང་ཡོད་འདུག དམིགས་བསལ་བོད་ཀྱི་སྐད་ཡིག་རྩ་མེད་བཟོ་བར་དམིགས་ནས་བོད་ཕྲུག་རྣམས་བཙན་དབང་གིས་གཏན་ སློབ་ཁག་ནང་བཅུག་ནས་རྒྱ་ཡིག་རྒྱ་སྐད་མ་གཏོགས་བོད་ཡིག་སློབ་ཁྲིད་མ་བྱས་པར་བོད་ཀྱི་སྐད་ཡིག་རྩ་མེད་བཟོ་ཐབས་བྱེད་བཞིན་པ་དང་། ད་བར་བོད་ནང་བྱིས་པ་ལོ་ན་བཞི་ནས་ ༡༨སླེབས་པ་ས་ཡ་གཅིག་ཙམ་བཙན་དབང་གིས་གཏན་སྡོད་སློབ་གྲྭ་ཁག་ནང་བཅུག་ཡོད་པའི་སྐོར་དང་། དེ་བཞིན་ཕྱི་ལོ་༢༠༠༡ལོ་ནས་བཟུང་བོད་མི་འབྲོག་པ་ས་ཡ་གཅིག་དང་འབུམ་བརྒྱད་ཙམ་བཙན་དབང་གིས་རང་གི་ཕ་མེས་ཡང་མེས་ཀྱི་ས་ཁུལ་ནས་ས་གནས་གཞན་དང་གྲོང་ཁྱེར་སོགས་སུ་གནས་སྤོ་རུ་བཅུག་ནས་ཁོང་ཚོར་དཔལ་འབྱོར་གྱི་དཀའ་ངལ་ཆེན་པོ་འཕྲད་བཞིན་པ། བོད་ནང་གི་དགོན་པ་གྲྭ་ཚང་ཁག་གི་དགེ་འདུན་པ་དང་བཙུན་མ་ཚོར་བཙན་དབང་གིས་རྒྱ་ནག་དམར་པོའི་གཞུང་ལ་དགའ་ཞེན་བྱ་དགོས་པའི་ཆབ་སྲིད་ཀྱི་སློབ་གསོ་སྤྲོད་པ་དང་། དགོན་པའི་དཔལ་འབྱོར་དང་ཆོས་དད་རང་དབང་ལ་སྟངས་འཛིན་བྱེད་བཞིན་པ། དེ་བཞིན་དགོན་པའི་ཆོས་ཕྱོགས་ཀྱི་དབུ་ཁྲིད་རྣམས་རྒྱ་ནག་གཞུང་གིས་བཙན་དབང་གིས་བསྐོ་བཞག་བྱེད་བཞིན་པ་སོགས་བོད་མིའི་ཆོས་དད་རང་དབང་ལ་རྡོག་རོལ་གཏོང་བཞིན་པ་བཅས་དོན་ཚན་གསུམ་གྱི་ཐོག་གནས་སྟངས་གསལ་སྟོན་གནང་འདུག

གསར་འགོད་པ། ཚེ་དབང་དངོས་གྲུབ།
རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།