ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་ལགས་ནས་ཧིན་བོད་གཉིས་ཀྱི་ས་མཚམས་ལ་ངོས་འཛིན་གནང་བར་ཐུགས་རྗེ་ཆེ་ཞུས་གནང་འདུག

དབུས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་ཞུས་པའི་རྒྱ་གར་རྒྱལ་ཡོངས་བོད་དོན་དྲིལ་བསྒྲགས་ཀྱི་སྦག་སྦག་སྐོར་སྐྱོད་ཀྱི་ལས་འགུལ་དེ་བཞིན་འདི་ཚེས་ ༢༢ ཉིན་རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེའི་ནང་གི་ཧིན་བོད་ས་མཚམས་འབུམ་ལ་ནས་དངོས་སུ་འགོ་འཛུགས་ཀྱིས། ཨ་རུ་ནཱ་ཅལ་མངའ་སྡེའི་ནང་གི་རྟ་དབང་ས་གནས། སྡི་རང་། ཟེ་ལ། འབུམ་སྡེ་ལ། བསྟན་འཛིན་སྒང་དང་སྟེཛ་པུར། བཅས་ཀྱི་ནང་སྦག་སྦག་སྐོར་སྐྱོད་ཀྱི་ལས་འགུལ་གནང་གྲུབ་རྗེས། འདི་ཚེས་ ༢༦ ཉིན་ཨ་རུ་ནཱ་ཅལ་མངའ་སྡེའི་རྒྱལ་ས་ཨི་ཊ་ནཱ་སྒར་འབྱོར་ཡོད་པ་དང་། སྐབས་དེར་ས་གནས་བོད་མི་དང་ཨི་ཊ་ན་གར་ས་གནས་བོད་རང་བཙན་ནས་སློབ་ཕྲུག་ཚོགས་པའི་ཚོགས་མི་དང་ས་གནས་ཡུལ་མི་བཅས་ནས་ཕེབས་བསུའི་སྣེ་ལེན་ཞུས་ཡོད་པ་མ་ཟད། མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་ལགས་ནས་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་དབུས་པས་སྦག་སྦག་སྐོར་སྐྱོད་ཀྱི་ལས་འགུལ་བ་རྣམས་ལ་དམིགས་བསལ་ཐུག་འཕྲད་ཀྱིས། སྐབས་དེར་ཚོགས་གཙོ་མགོན་པོ་དོན་གྲུབ་ལགས་ཀྱིས་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་ལགས་ནས་ཧིན་བོད་གཉིས་ཀྱི་ས་མཚམས་ལ་ངོས་འཛིན་དང་། བོད་དང་བོད་མིའི་འཐབ་རྩོད་ལ་རྒྱབ་སྐྱོར་ཤུགས་ཆེ་གནང་བར་ཐུགས་རྗེ་ཆེ་ཞུས་ཡོད་སྐོར། ཚོགས་གཙོ་མགོན་པོ་དོན་གྲུབ་ལས་ནས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།

དེ་བཞིན་ཡང་ཁོང་གིས་མུ་མཐུད། ད་རེས་ཀྱི་གཞོན་ནུ་ལྷན་ཚོགས་ཀྱི་བོད་དོན་དྲིལ་བསྒྲགས་ཀྱི་སྦག་སྦག་སྐོར་སྐྱོད་ཀྱི་ལས་འགུལ་གྱི་དགོས་འདུན་གཙོ་བོ་གསུམ་ནི། དང་པོ་བོད་ནང་རྒྱ་ནག་གཞུང་གིས་མི་རིགས་རྩ་མེད་ཀྱི་སྲིད་ཇུས་དེ་འཕྲལ་ཏུ་མཚམས་འཇོག་དགོས་པ། གཉིས་པ། རྒྱ་གར་གྲོས་ཚོགས་ནང་བོད་དེ་ལོ་རྒྱུས་ཐོག་ནས་རང་བཙན་ཡིན་པ་ཞིང་ད་ལྟའི་ཆར་རྒྱ་ནག་གཞུང་གི་བཙན་འོག་ཏུ་ཡོད་པའི་རྒྱལ་ཁབ་ཅིག་ཡིན་པར་ངོས་འཛིན་གྱིས་གྲོས་ཆོད་གཏན་འབེབས་གནང་རྒྱུ། གསུམ་པ། བོད་དེ་བཞིན་འཛམ་གླིང་གི་སྣེ་གསུམ་པ་ཡིན་པས་ཆ་ནས་ད་ཆ་རྒྱ་ནག་གཞུང་གི་བོད་ཀྱི་ཁོར་ཡུག་ལ་གཏོར་བཤིག་དང་གནོད་བཅུད་ལ་ཉེན་ཁ་བཟོ་བཞིན་ཡོད་དུས་འཛམ་གླིང་མི་མང་ནས་དེར་དོ་སྣང་དང་རྒྱབ་སྐྱོར་གནང་རྒྱུ་སོགས་ཡིན་སྐོར་འགྲེལ་བརྗོད་གནང་གི་འདུག

བོད་ཀྱི་གཞོན་ནུ་ལྷན་ཚོགས་ཀྱིས་གོ་སྒྲིག་ཞུས་པའི་སྦག་སྦག་སྐོར་སྐྱོད་ཀྱི་ལས་འགུལ་དེ་བཞིན། ཁྱོན་ཟླ་བ་གཉིས་ཙམ་རིང་རྒྱ་གར་གྱི་མངའ་སྡེ་ཁག་ཉི་ཤུའི་ནང་གྱི་རྒྱལ་ས་དང་གྲོང་ཁྱེར་ཆེ་ཁག་ནང་སྐོར་སྐྱོད་ཀྱིས། མངའ་སྡེའི་སྤྱི་ཁྱབ་བློན་ཆེན་གཙོས་པའི་ས་གནས་དང་དབུས་གྲོས་ཚོགས་འཐུས་མིར་མཇལ་འཕྲད་དང་། ས་གནས་སུ་གསར་འགོད་འདུ་སྐོང་གནང་སྟེ་གསར་འགོད་གསལ་བསྒྲགས་བརྒྱུད་བོད་དོན་དྲིལ་བསྒྲགས་གནང་རྒྱུ་སོགས་ཀྱི་ལས་རིམ་ཡོད་པ་རེད་འདུག་ལ། ཨ་རུ་ནཱ་ཅལ་མངའ་སྡེའི་ནང་གིས་སྦག་སྦག་སྐོར་སྐྱོད་ཀྱི་ལས་འགུལ་སྒྲུབ་པའི་རྗེས་ནཱ་གྷ་ལེནཌ་མངའ་སྡེའི་གྲོང་ཁྱེར་སྡི་མ་པུར། དང་ཨ་སམ་མངའ་སྡེའི་གྲོང་ཁྱེར་གྷོ་ཧ་ཊི་བཅས་སུ་སྐོར་སྐྱོད་ཀྱི་བོད་དོན་དྲིལ་བསྒྲགས་ཀྱི་ལས་འགུལ་མུ་མཐུད་སྤེལ་གནང་རྒྱུ་ཡིན་འདུག

གསར་འགོད་པ། པདྨ་དངོས་གྲུབ།

རྩོམ་སྒྲིག་པ། བདེ་སྐྱིད་ཀུན་སྒྲོལ།

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།