ཨ་རིས་ཕྱི་འབྲེལ་རོགས་དངུལ་ཁག་གནས་སྐབས་མཚམས་འཇོག་བྱས་བའི་བཀའ་ཁྱབ་འོག་བོད་མི་ཚོར་རག་བཞིན་པའི་རོགས་དངུལ་ཡང་ཚུད་ཡོད་པ་རེད།
ཨ་མི་རི་ཀའི་གཞུང་འཛིན་གསར་པས་ཕྱིའི་ཡུལ་གྲུ་ཁག་ལ་མཐུན་འགྱུར་རོགས་དངུལ་གནང་རྒྱུ་དང་དེ་བཞིན་ཨ་མི་རི་ཀའི་ཕྱི་སྲིད་ལྷན་ཁང་ནས་ཐད་ཀར་རོགས་དངུལ་གནང་བཞིན་པའི་ལས་འཆར་ཆ་ཚང་གནས་སྐབས་ཟླ་བ་གསུམ་རིང་མཚམས་འཇོག་དགོས་ལུགས་ཀྱི་བཀོད་ཁྱབ་བཏང་ཡོད་པ་དང་། འདི་ག་ཨེ་ཤེ་ཡ་རང་དབང་རླུང་འཕྲིན་ཁང་གིས་ཨ་རིའི་ཕྱི་སྲིད་ལྷན་ཁང་གི་འབྲེལ་ཡོད་ལ་ཨ་རིའི་ཕྱི་འབྲེལ་རོགས་དངུལ་སྐབས་ཅིག་རིང་དུས་འགྱངས་གནང་བ་དེའི་སྐོར་འདྲི་རྩད་སྐབས་ཡིག་ཐོག་བཀའ་ལན་གནང་བའི་ནང་། ཨ་རིས་ཕྱིའི་རྒྱལ་ཁབ་ཁག་ལ་རོགས་དངུལ་སྤྲོད་ཕྱོགས་ཐད་མི་དམངས་ཀྱི་ཁྲལ་དངུལ་བེད་སྤྱོད་གཏོང་ཕྱོགས་འགན་འཁྲིའི་ཐད་ཕྱི་སྲིད་ལྷན་ཁང་དང་ཨ་རིའི་རོགས་ཚོགས་གཉིས་ཀྱིས་ཧ་ཅང་གིས་གཟབ་ནན་བྱེད་ཀྱི་ཡོད། སྲིད་འཛིན་ཌོ་ནལཌི་ཊམཔ་མཆོག་གིས་ཕྱི་འབྲེལ་རོགས་དངུལ་ལ་བསྐྱར་ཞིབ་དང་བསྐྱར་སྒྲིག་གནང་རྒྱུའི་བཀོད་ཁྱབ་དང་མཐུན་པའི་ཐོག་ནས། ཕྱི་སྲིད་ལྷན་ཁང་དང་ཨ་རིའི་རྒྱལ་སྤྱིའི་ཡར་རྒྱས་གོང་སྤེལ་ལས་ཁུངས་བརྒྱུད་ཨ་རིའི་ཕྱི་འབྲེལ་རོགས་དངུལ་ཡོངས་རྫོགས་ལ་བསྐྱར་ཞིབ་ཆེད་སྐབས་འཕྲལ་དུས་འགྱངས་བྱས་ཡོད། ང་ཚོས་ཨ་མི་རི་ཀའི་ཁེ་ཕན་དང་མཐུན་པ་ཡོད་མེད་གསལ་པོ་བཟོ་ཆེད་ཕྱི་འབྲེལ་རོགས་དངུལ་ཡོངས་རྫོགས་ལ་དཔྱད་ཞིབ་བྱེད་བཞིན་ཡོད་ལ། དཔྱད་ཞིབ་ཀྱི་དུས་ཡུན་རིང་དམིགས་བསལ་གུ་ཡངས་ཡོད་པའི་ལས་གཞི་ཁག་ཕུད། ཕྱི་འབྲེལ་རོགས་དངུལ་གྱི་མ་དངུལ་ཚང་མ་དུས་འགྱངས་བྱས་ཡོད་ཅེས་ལན་འདེབས་གསལ་བཤད་གནང་བྱུང་།
དེ་བཞིན་མིང་བརྗོད་འདོད་མེད་པའི་ཨ་རིའི་གཞུང་གི་དངུལ་གཏོང་ལེན་དང་འབྲེལ་ཡོད་མི་སྣ་ཤིག་གིས་འདི་ག་རླུང་འཕྲིན་ཁང་ལ་གསུང་ན། ཨ་རིའི་ཕྱི་འབྲེལ་རོགས་དངུལ་རེ་ཞིག་མཚམས་འཇོག་བྱས་པ་དེས་བོད་མིའི་སྒྲིག་འཛུགས་ཐེ་བའི་རོགས་དངུལ་རག་ཡུལ་ཁག་ལ་དོ་ཕོག་གཅིག་གྱུར་འགྲོ་བཞིན་ཡོད་པ་འགྲེལ་བརྗོད་གནང་གི་འདུག་ཀྱང་ཞིབ་ཕྲ་ད་ལྟ་རྩད་གཅོད་ཞུ་མུས་ཡིན།
ཨ་རིའི་སྲིད་གཞུང་གསར་པས་རྒྱལ་སྤྱིའི་ནང་རོགས་དངུལ་ལས་གཞི་ཁག་གནས་སྐབས་རིང་མཚམས་འཇོག་གིས་རོགས་རམ་གནང་ཡུལ་ཁག་ལ་བསྐྱར་ཞིབ་གནང་རྒྱུའི་བཀོད་ཁྱབ་བཏང་གནང་ཡོད་པ་བཞིན། ཨ་མི་རི་ཀའི་ཕྱི་སྲིད་དྲུང་ཆེ་(Marco Rubio)་མཆོག་གིས་སྲིད་འཛིན་གྱི་བཀོད་ཁྱབ་གཞིར་བཟུང་ཉིན་ཤས་གོང་ཕྱིའི་ཡུལ་གྲུ་ཁག་ནང་ཡོད་པའི་ཨ་མི་རི་ཀའི་གཞུང་ཚབ་ཚང་མར་བཀོད་ཁྱབ་བཏང་གནང་ཡོད་པ་དེའི་ནང་། US Agency for International Development (USAID) བརྒྱུད་ནས་ཕྱིའི་ཡུལ་གྲུ་ཁག་ལ་མཐུན་འགྱུར་རོགས་དངུལ་གནང་རྒྱུ་དང་དེ་བཞིན་ཨ་མི་རི་ཀའི་ཕྱི་སྲིད་ལྷན་ཁང་ནས་ཐད་ཀར་རོགས་དངུལ་གནང་བའི་ལས་འཆར་ཆ་ཚང་གནས་སྐབས་ཟླ་བ་གསུམ་རིང་མཚམས་འཇོག་དགོས་ལུགས་ཀྱི་བཀོད་ཁྱབ་བཏང་གནང་ཡོད་པ་རེད།
གནད་དོན་འདི་དང་འབྲེལ་བྱང་ཨ་རིའི་བོད་ཀྱི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་སུ་འདི་ག་རླུང་འཕྲིན་ཁང་གིས་བཀའ་འདྲི་ཞུས་པའི་སྐབས་ཁོང་གིས། ཨ་རིའི་སྲིད་གཞུང་གསར་པས་རྒྱལ་སྤྱིའི་ནང་རོགས་དངུལ་ལས་གཞི་ཁག་གནས་སྐབས་རིང་མཚམས་འཇོག་གིས་རོགས་རམ་གནང་ཡུལ་ཁག་ལ་བསྐྱར་ཞིབ་གནང་རྒྱུའི་བཀོད་ཁྱབ་དེ་ཕྱི་འབྲེལ་རོགས་དངུལ་རག་ཡུལ་ཚང་མར་གཅིག་མཚུངས་ཁྱབ་ཡོད་དུས། བོད་མི་ཚོར་ད་བར་ཨ་རིའི་གྲོས་ཚོགས་ནས་རྒྱབ་སྐྱོར་དང་ཆོག་མཆན་ཐོབ་པ་བརྒྱུད་རོགས་དངུལ་རག་བཞིན་པ་ཡིན་དུས། ང་ཚོའི་ངོས་ནས་ཨ་རིའི་ཕྱི་སྲིད་ལས་ཁུངས་གཙོས་འབྲེལ་ཡོད་ཁག་ལ་འབྲེལ་བ་བྱས་ཏེ་བོད་མི་ཚོར་ཐོབ་བཞིན་པའི་རོགས་དངུལ་ཁག་གང་མགྱོགས་བསྐྱར་ཞིབ་དང་ཆོག་མཆན་རག་ཐབས་འབད་བརྩོན་ཞུ་དང་ཞུ་མུས་ཡིན་པ་གསུངས་བྱུང་།
གསར་འགོད་པ། བསྟན་འཛིན་པདྨ། བོད་རྒྱལ། བཀྲ་ཤིས་དབང་ཕྱུག རིག་འཛིན་ཆོས་སྒྲོན།
རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།