འཛམ་གླིང་གི་ཡུལ་གྲུ་གང་ས་ནས་Donald Trump ལ་སྲིད་འཛིན་འོས་བསྡུའི་ཁྲོད་རྒྱལ་ཁ་ཐོབ་པར་དགའ་བསུའི་འཚམས་འདྲི་གནང་འདུག

ཨ་རིའི་སྲིད་འཛིན་གྱི་འོས་བསྡུའི་གྲུབ་འབྲས་གཟིགས་རྒྱུར་འདིར་མནན།

ཕྱི་ཚེས་༦ཉིན་Trump ལ་ཨ་མི་རི་ཀའི་སྲིད་འཛིན་གྱི་འོས་བསྡུའི་རྒྱལ་ཁ་ཐོབ་པར་ཐེ་ཝན་གྱི་སྲིད་འཛིན་Lai Ching te ཡིས་འཚམས་འདྲི་ཞུས་གནང་པ་དང་སྦྲགས། ཁོང་གིས་བཙན་ཤེད་ཀྱི་རྣམ་པ་ཆེ་རུ་འགྲོ་བཞིན་པའི་རྒྱ་ནག་ལ་ཁ་གཏད་གཅོག་མཁན་གྱི་ཐེ་ཝན་གྱི་མཐུན་གྲོགས་གཙོ་བོའི་འགོ་ཁྲིད་རྗེས་མར་རྒྱབ་སྐྱོར་གནང་རྒྱུའི་ཁས་ལེན་གནང་ཡོད་པ་རེད།

ཡང་Lia ཡིས་མུ་མཐུད་ཨ་མི་རི་ཀའི་སྲིད་འཛིན་Trump དང་ཨ་རིའི་གཞུང་མང་ལ་སྙིང་དབུས་ནས་འཚམས་འདྲིའི་བཀྲིས་བདེ་ལེགས་ཞུ་རྒྱུ་དང་།  ཐེ་ཝན་དང་ཨ་རིའི་དབར་ཡུན་རིང་གི་མཉམ་ལས་དེ་མུ་མཐུད་དུ་མངའ་ཁུལ་དེའི་བརྟན་ལྷིང་དང་།  ང་ཚོ་ཚང་མའི་འཕེལ་རྒྱས་ཀྱི་དམིགས་ཡུལ་ཞིག་ཏུ་འགྱུར་བའི་གདེང་ཚོད་དང་། ཡིད་ཆེས་གཏན་པོ་ཡོད་ཅེས་Xསྤྱི་ཚོགས་དྲྭ་རྒྱའི་ནང་བཀོད་གནང་ཡོད་པ་རེད།

དེ་བཞིན་ཨི་སི་རལ་གྱི་སྲིད་བློན་ Netanyahu ཡི་འཚམས་འདྲིའི་ནང་Donald Trump ལ་འོས་བསྡུའི་རྒྱལ་ཁ་ཐོབ་པ་དེ་ནི་ལོ་རྒྱུས་ཀྱི་རྒྱལ་ཁ་ཆེན་པོ་ཞིག་རེད།  སྐུ་ཉིད་བསྐྱར་དུ་ཕོ་བྲང་དཀར་པོའི་ནང་ཕེབས་ནས་ཨ་མི་རི་ཀ་དང་ཨི་སི་རལ་གྱི་མཛའ་འབྲེལ་གོང་འཕེལ་དང་།  སྲ་བརྟན་གཏོང་རྒྱུའི་ཐུགས་རེ་ཡོད་ཅེས་གསལ་སྟོན་གནང་འདུག

ཡང་ཡུག་རེན་གྱི་སྲིད་འཛིན་ Zelenskyy ཡིས་ཨ་མི་རི་ཀའི་སྲིད་འཛིན་Donald Trump ཡིས་ནུས་སྟོབས་བཏོན་གནང་སྟེ་འཛམ་གླིང་ལ་ཞི་བདེ་སྐྲུན་གནང་རྒྱུའི་ཆོད་སེམས་བཙུགས་ཡོད་པར་རྗེས་སུ་ཡིད་རངས་ཞུ་རྒྱུ་དང་།  དེ་ནི་ཡུག་རེན་ནང་དོན་དམ་གྱི་ཞི་བདེ་བསྐྲུན་ཐབས་ཀྱི་ཐབས་ལམ་ཞིག་ཀྱང་རེད་ཅེས་X དྲྭ་རྒྱའི་ཐོག་གནས་ཚུལ་སྤེལ་གནང་འདུག

ཡང་དབྱིན་ཇིའི་སྲིད་བློན་ Keir Starmer གིས་Donald Trump ལ་ལོ་རྒྱུས་ཀྱི་དོན་སྙིང་ལྡན་པའི་འོས་བསྡུའི་རྒྱལ་ཁ་ཐོབ་པར་འཚམས་འདྲི་ཞུ་རྒྱུ་དང་ཆབས་ཅིག་ཨ་རི་དང་དབྱིན་ཇི་རྒྱལ་ཁབ་གཉིས་ཀྱི་ཐོུང་མ་ཡིན་པའི་འབྲེལ་བ་དེ་མུ་མཐུད་རྒྱུན་འཁྱོངས་དང་། མ་འོངས་པའི་ལོ་ཟླའི་ནང་མཉམ་ལས་གནང་ཐུབ་པའི་རེ་བ་ཡོད་ཅེས་སོགས་གསལ་སྟོན་གནང་འདུག

རྒྱ་གར་གྱི་སྲིད་བློན་Modi ཡིས་Donald Trump ལ་ཨ་མི་རི་ཀའི་སྲིད་འཛིན་འོས་བསྡུའི་ནང་རྒྱལ་ཁ་ཐོབ་པ་དེ་ལོ་རྒྱུས་རང་བཞིན་ཅན་ཞིག་ཏུ་བརྩིས་ནས་འཚམས་འདྲི་ཞུས་གནང་བ་དང་སྦྲགས། རྒྱ་གར་དང་ཨ་མི་རི་ཀའི་དབར་དུ་ཡོད་པའི་གོ་ལ་ཡོངས་ཁྱབ་ཀྱི་ཐབས་ཇུས་ཀྱི་མཐུན་གྲོགས་དམ་དུ་གཏོང་བའི་ཆེད་དུ་ང་ཚོའི་མཉམ་འབྲེལ་བསྐྱར་གསོ་གནང་རྒྱུར་ངས་རེ་སྒུག་བྱེད་ཀྱི་ཡོད་ཅེས་ཁོང་གི་X དྲྭ་རྒྱའི་ཐོག་བཀོད་གནང་ཡོད་པ་རེད།

དབུས་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས། སྐུ་ཞབས་Donald Trump་ལ་ཨ་མི་རི་ཀའི་སྲིད་འཛིན་དུ་སླར་ཡང་འོས་འདེམས་ཐོན་བྱུང་བར་མཚམས་འདྲི་ཞུས་ཏེ་འབྱུང་འགྱུར་ལོ་བཞིའི་ནང་སྲིད་འཛིན་གྱི་ལས་དོན་ལམ་ལྷོང་ཡོང་བའི་ཐུགས་རེ་ཡོད་པ་ཨེ་ཤི་ཡ་རང་དབང་རླུང་འཕྲིན་ཁང་ལ་གསུངས་གནང་བྱུང་།

ཡང་རྒྱ་གར་མང་ཚོགས་ཁྲོད་ནས་སྲིད་འཛིན་Trump ལ་རྒྱལ་ཁ་ཐོབ་པར་དགའ་མོས་གནང་མཁན་མང་པོ་ཡོད་པ་རེད་འདུག དེ་ཡང་རྒྱ་གར་གྱི་རྒྱལ་ས་ལྡི་ལིའི་ནང་གཏན་སྡོད་གནང་མཁན་རྒྱ་གར་བ་སྤར་ཤན་ཐར་ཞུ་བ་ཞིག་གིས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་དོན་། སྤྱི་ལོ་༢༠༢༤ལོའི་ཨ་མི་རི་ཀའི་སྲིད་འཛིན་འོས་བསྡུའི་ཁྲོད་དུ་སྲིད་འཛིན་གྱི་འོས་མི་རྣམ་གཉིས་སུ་རུང་ལ་རྒྱལ་ཁ་ཐོབ་པ་ཡིན་ནའང་གང་ལྟར་རྒྱ་གར་གཞུང་དང་མཐུན་འབྲེལ་བཟང་པོ་བཟུང་མཁན་ཞིག་ལ་རྒྱལ་ཁ་ཐོབ་ན་དེ་འགྲིགས་བསམ་པ་བྱུང་ཡང་མཐར་Trump ལ་རྒྱལ་ཁ་ཐོབ་པའི་གནས་ཚུལ་ཐོས་ནས་ཧ་ཅང་གི་དགའ་པོ་བྱུང་།  གང་ཡིན་ཞུས་ན་འདས་པའི་ནང་ཨ་མི་རི་ཀའི་སྲིད་འཛིན་Trump དང་རྒྱ་གར་གྱི་སྲིད་བློན་Modi དབར་གྱི་འབྲེལ་ལམ་དེ་དོན་དང་ལྡན་པའི་འབྲེལ་ལམ་ཞིག་ཡོད་པ་ཤེས་རྟོགས་བྱུང་རྗེས་ད་རེས་Trump ལ་རྒྱལ་ཁ་ཐོབ་པ་དེས་མ་འོངས་ཨ་རི་དང་རྒྱ་གར་གཉིས་དབར་གྱི་འབྲེལ་ལམ་སྔར་ལས་ལྷག་པ་འཕེལ་རྒྱས་ཕྱིན་པ་ཡིན་ན་རྒྱ་གར་ལ་ཕན་ཐོགས་ཆེན་པོ་ཡོད་པ་ཚོར་གྱི་འདུག་ཅེས་གསུང་འདུག

ཡང་རྒྱ་གར་བ་སོའོ་ཧོན་ལན་ཞུ་བ་ཞིག་གིས།  ད་རེས་Trump ལ་སྲིད་འཛིན་གྱི་རྒྱལ་ཁ་ཐོབ་པར་དགའ་པོ་ཞེ་དྲག་བྱུང་།  ཁོང་གིས་རྒྱ་གར་ལ་གཟིགས་སྟངས་ཡག་པོ་ཡོད་པ་རེད།  གང་ཡིན་ཞུས་ན་ཁོང་དང་རྒྱ་གར་གྱི་སྲིད་བློན་Modi རྣམ་གཉིས་འབྲེལ་བ་ཡག་པོ་ཡོད་པ་མ་ཟད།  ཁོང་གིས་དམག་མཚམས་འཇོག་བྱེད་ཀྱི་ཡིན་ཞེས་གསུང་གི་ཡོག་རེད།  ཁོང་གི་ཨ་མི་རི་ཀ་སྟངས་འཛིན་ཡག་པོ་ཞིག་གནང་ཐུབ་ཀྱི་རེད་བསམ་གྱི་འདུག་ཅེས་གསུང་གི་འདུག།

གསར་འགོད་པ། དབྱངས་སྒྲོལ། སྒྲོལ་མ་ལྷ་མོ།

རྩོམ་སྒྲིག་པ། དོན་གྲུབ་རྣམ་རྒྱལ།

དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།

དྲྭ་ཐོག་སྤེལ་མཁན། པ་སངས་དོན་ལྡན།